Каспийде итбалықтар жаппай қырылып жатыр

Маңғыстау облысында Түпқараған ауданы аумағындағы теңіз жағалауынан 88 итбалықтың өлексесі табылды. «Қазақстанның қызыл кітабына» енген су жануарларының қырылу дерегін балық инспекциясының қызметкерлері мониторинг кезінде анықтаған. Оқиға орнына Гидробиология және экология институтының мамандары да барды. Алдын ала болжам бойынша теңіз сүтқоректілері 2-3 апта бұрын өлген. Қазір оларды жинау, жою жұмыстары жүргізіліп жатыр. Бұл жыл басынан бері тіркелген екінші оқиға. Бұған дейін инспекторлар теңізде браконьерлік ауға түсіп өлген итбалықтарды анықтаған еді.

Қонарбай Базарбаев, облыстық балық инспекциясы басқармасының Түпқараған аудандық бөлімінің басшысы:

Жақында солтүстік батыстан соққан қатты желдің барысында жағаға шығарып тастаған. 88 итбалықтың ішінде екеуі ау құралдарына оралып жағада жатыр. Нақты айту қиын, қазір олармен институттар айналысып жатыр. Сынама алу итбалықтардан қатты шіріп кеткен. Сынама алу мүмкін емес болып жатыр.

Аягөз Оралбайқызы