Таразда ел тыныштығы жолында ерлік көрсеткендерді еске алды

Тәуелсіздік жылдарынан бүгінге дейін Жамбыл облысында 73 полицей қызмет бабында қайтыс болған. Ел тыныштығы жолында ерлік көрсеткен құқық қорғау саласы қызметкерлерін әулиеаталық әріптестері еске алды.

Полицейлер мен сала ардагерлері «Жеңіс» саябағына жиналып, халық қаһарманы Ғазиз Байтасовтың ескерткішіне гүл шоқтарын қойды. Көзі тірісінде полиция капитаны болған ол қылмыскер қолындағы гранатаны денесімен жауып қаза болған еді. Осы ерлігі үшін Байтасовқа «Халық қаһарманы» атағы берілді. Өңірде батыр полицейдің жолын жалғап, жоғары дәрежелі «Айбын» орденін алған 17, «Ерлігі үшін» медалімен марапатталған 23 полицей қызмет етеді.

Тұрдалы Шералин, облыстық ішкі істер органдары ардагерлері кеңесінің төрағасы:

Президенттің қойған тәртібі – бүкіл құқық қорғау органдарына «Заң мен тәртіп» қағидасын орнату керек. Учаскелік полицейлердің барлығына 1 жылды 1,5 жыл есебінде беретін болды. Одан кейін оперативті жұмыстар мен басқалардың барлығына жалақыларын көтереміз деді. Бұл біздің имиджімізді көтеретін іс-шара деп білемін.

Данияр Әлімқұл