«Жасыл ел» жастары Таразда тұрғын үйлер ауласын тазартты

Таразда шіліңгір шілденің ыстығына қарамастан «Жасыл ел» еңбек жасағының жастары тазалық жұмысына белсенді қатысып жатыр.

Олар тұрғын үйлердің ауласын жайлаған қураған шөпті шауып, арықтарды қоқыс қалдықтарынан тазалады. Жалпы жыл басынан бері облыс бойынша 2 мыңға жуық студент жастар ұйымына қабылданған. Табиғат жанашырлары жаз басталысымен елді мекендерді аралап, экологиялық акцияға үлкен үлес қосып келеді. Айта кетейік, биыл өңірде «Таза Қазақстан» акциясына 106 мың адам қатысып, 6 мың тоннадан асатын тұрмыстық қалдық шығарылды.

Қырмызы Шәмшідін, студент:

«Жасыл елде» жұмыс бар екенін және ол жаққа жұмысшылар керек екенін білгенде бірден келіскен адамның бірімін. Өйткені, біз бұл жерде айлық қана алып қоймаймыз. Менің басты мақсатым - өзіміздің туған қаламыздың тазалығын сақтап, жастарға, тұрғындарға тазалықты насихаттау.

Данияр Әлімқұл