АЭС-ке үздік атау беру бойынша байқау басталды

Бүгін елімізде салынатын алғашқы атом электр станциясына атау беру бойынша жалпыхалықтық конкурс басталды. Байқауға кез келген қазақстандық eGov Mobile арқылы қатыса алады. Басты бетте «АЭС-ке атау ұсыныңыз» баннері шыққан. Қатысу үшін тілді таңдап, өз нұсқаңызды енгізу қажет. Кейін атаудың мәнін қысқаша сипаттап, ресми қағидалармен танысқаныңызды растайсыз. Ұсыныстар 10 қазан түнгі 23:59-ға дейін қабылданады. Бастаманың мақсаты – болашақ станцияға тарихи, мәдени әрі ұлттық мәні айқын атау таңдау.