LRT желісі сынақ режимінде іске қосылды

Бүгін алғаш рет LRT пойызы сынақ режимінде іске қосылды. Мамандар рельстерді, станцияларды, байланыс желілерін, қауіпсіздік пен қозғалысты тексереді. Пойыздар бастапқыда сағатына 10 шақырым жылдамдықпен қозғалады. Кейін жылдамдық артады. Сондай-ақ, сынақ аймақтары да кезең-кезеңімен көбейеді. LRT құрамдары GoA4 аппараттық-бағдарламалық кешенімен жабдықталған. Бұл толықтай автоматтандырылған жүйе. Яғни жеңіл рельсті көлік жүргізушісіз қозғалады.

Орынбасар Ағыбаев, «City Transportation Systems» ЖШС басқарушы директоры:

GoA4 жүйесі – рельсті көліктің ең заманауи автоматтандыру жүйесі. Мұндай жүйелер Сингапурда, Дубайда қолданылады. Астанада бұл жүйені іске қосылар алдында кезең-кезеңімен тексеріп, қауіпсіздігі расталған соң ғана толық қолданысқа береміз.