Цифрлық активтерден ₸1,8 млрд заңсыз шығарғандар тергелді

Қаржылық мониторингтік агенттігі Қызылорда облысында заңсыз қаржы айналымын ұйымдастырып, есірткі сатылымынан пайда тауып келген қылмыстық топты әшкереледі. Екі күдікті цифрлық активтерді айырбастау операцияларын жүргізіп, криптоәмиян арқылы өткен жылы заңсыз жолмен 1,88 миллиард теңгені айналымнан шығарған. Сондай-ақ «Telegram» арналары арқылы есірткі сатудан түскен 603 миллион теңгені заңдастырған. Қылмыстық әрекетін жасыру үшін шетел азаматтарына тіркелген дроп-карталарды пайдаланып келген. Олар бұл қомақты қаржыға тұрғын үй, пәтер, 5 автокөлік сатып алып, отбасылық мейрамхана салған. Қазір аталған дерек бойынша тергеу аяқталып, қылмыстық іс сотқа жолданды.