Иран Ормуз бұғазында жаңа тәртіп орнатпақ

Иран парламенті Ормуз бұғазына қатысты жаңа құқықтық жүйені талқылап жатыр. Осы бойынша жаңа заң жобасы қабылдануы мүмкін. Құжатқа сай су жолы АҚШ пен Израильге және Иранға қарсы санкцияларды қолдайтын елдердің кемелері үшін жабық болады. Бұған қоса шетелдік кемелер Иран валютасымен арнайы салық төлеуге міндеттелуі мүмкін. 

АҚШ президенті Дональд Трамп болса, Иранға қайта қоқан-лоққы көрсетті. Сейсенбінің түніне қарай Ирандағы әр көпір қиратылып, әр электр станциясы істен шығады деген ескертуін қайталап айтты. Бұлай болмас үшін Трамп Тегераннан Ормуз бұғазын ашуды, келісімге келуді талап етті. АҚШ президенті ультиматум уақыты ұзартылмайтынын ескертті.