Алаяқтардың жаңа айласы анықталды

Интернет арқылы пәтер мен қонақүй брондау кезінде жасалатын алаяқтардың жаңа айласы анықталды. Ішкі істер министрлігі қазақстандықтарға ескерту жасады. Қаскөйлер жалған сайттар жасап, пайдаланушылардан банк картасының деректерін қайта енгізуді сұрайды. Ал шын мәнінде бұл мәліметтер жүйеде бұрыннан сақталады. Мамандар азаматтарды күмәнді сілтемелерден сақ болуға, арзан ұсыныстарға сенбеуге және тек тексерілген платформаларды пайдалануға шақырады. Егер алдын ала толық төлем талап етілсе, бұл да алаяқтықтың белгісі болуы мүмкін.