Түркістан облысында мал ұрлығымен айналысқан екі қылмыстық топ ұсталды

Түркістан облысында мал ұрлығымен айналысқан екі бірдей қылмыстық топ ұсталды. Күдіктілер Ордабасы мен Арыс ауданының аумағында барымташылық жасап, тұрғындарға 18 млн теңге көлемінде шығын келтірген. 5 адамнан құралған қылмыстық топ мүшелерінің бірі - бұрын мал ұрлығы үшін сотты болған Шымкент қаласының, ал қалғандары бір-біріне туыс болып келетін Ордабасы ауданының тұрғындары болып шықты.

Бүгінге дейін олар 26 бас жылқыны барымталаған. Дәл осындай екінші қылмыстық топ Арыс ауданында қолға түсті. Ұсталғандардан айғақты зат ретінде автокөліктері, 2 бас жылқы мен аңшы мылтығы алынды.

 Құрманбек Сахов, Түркістан облыстық Полиция департаменті бастығының орынбасары:

Олар жылқыларды жайылымда атып алып, сойып, еттерін базарға өткізіп отырған. Қазіргі таңда күдіктілер қамауға алынды. Қылмыстық кодекстің 188-бабы бойынша, яғни мал ұрлығы бойынша сотқа дейінгі тергеп-тексеру амалдары жүргізілуде.

Айнұр Ақбаева