Атыраулық шаруаларға 120 млн теңгеден астам өтемақы төленді

Атырау облысы Жылыой ауданында малынан айрылған шаруаларға 120 млн теңгеден астам өтемақы төленді. Тұрғындардан келіп түскен 101 өтініш толығымен қанағаттандырылған. Су тасқыны кезінде Құлсарыда 876 бас ұсақ және ірі қара мал зардап шеккен. Бұдан бөлек, 600-ден астам азаматқа баспанасын қалпына келтіру үшін қаражат төленген. Мобильдік топтар 1700-ге жуық үйді бағалау және техникалық тексерудің қорытындысын таныстырды. Бүлінген мүлікті бағалау жұмыстарын ертең аяқтау көзделіп отыр.

Айтуар Мырзағалиев, шаруа қожалығының төрағасы:

Өтінім бергеннен кейін көп ұзатпай қабылдап, ақшасын аударды. Ақшасына қанағаттанып жатырмыз.

Нұртас Қуатбаев, аудандық кәсіпкерлік және ауыл шаруашылығы бөлімінің басшысы:

Құжаттары түгел болған жағдайда құрылған комиссияға тапсырылады. Комиссия 15 күннің ішінде тексеріп, нақты қорытындысын беріп отыр.

Нұрсұлтан Нұрсейіт