Солтүстік Қазақстанда волонтерлар жемқорлармен күресіп, мемлекеттің 83 млн теңгесін үнемдеген

Солтүстік Қазақстан облысында сыбайлас жемқорлыққа қарсы жұмыс істеген волонтерлік топ 83 млн теңгеден астам бюджет қаражатының негізсіз жұмсалуына тосқауыл қойды. Еріктілер бұдан өзге мемлекеттік сатып алу саласында 8 күмәнді деректі анықтады. Сондай ақ олар мыңға жуық адамға тегін құқықтық көмек көрсетті.

Жалпы облыста 125 адам ерікті ретінде жұмыс істеуге ниет білдірген. Жемқорлықтың жолын кескен белсенділер қазір жол сапасын қадағалап, құрылыс саласында да жұмыс істеп жүр. Аудан, қала, республикалық маңызы бар 20-дан астам жол учаскесінде мониторинг жүргізді.

Ерлан Әбілкәрімов, волонтер:

Тиісті мамандардың көмегімен мемлекеттік тапсырыс бойынша салынып жатқан нысандардың құрылысын, жол сапасын тексереміз. Олқылық анықталса, тапсырыс берушіге нұсқау жолдаймыз. Көбіне нысандардың паспорты болмай жатады, жаңадан салынған жолдар жарылады. Осының барлығы қалыпқа келтірілгенше жұмысты қадағалаймыз.

Эльмира Кәленова