Петропавлда бірнеше көпқабатты үйде жылу жоқ

Петропавлда да бірнеше көпқабатты үйдің тұрғындары әлі күнге жылусыз отыр.

Биыл теріскейде күн әдеттегіден ерте суытты. Шаһарда жылыту маусымы қыркүйек айының соңында басталған. Қазір ауа температурасы кей аудандарда -15 градусқа дейін төмендеп тұр. Жылуы жоқ үйлердің иелері электр қуатымен жұмыс істейтін жылытқыш құралдардың көмегімен күнелтуде.

Татьяна Гурьянова, қала тұрғыны:

Қазір электр қуатын жиі пайдаланып отырмыз. Төлейтін ақшамыз көбейіп шыға келетіні анық. Әсіресе балаларға қиын соғып тұр. Түнде қалың киіммен ұйықтаймыз. Қалалық әкімдікке хабарластық, әзірге жауап жоқ.

Облыс орталығында 1200-ге жуық көпқабатты баспана бар. Әкімдік өкілдерінің айтуынша, қазір жылусыз отырған үйлердің тұрғындары қыс мезгіліне дер кезінде қамданбаған.

Әсем Айтолла, қалалық әкімдіктің баспасөз хатшысы:

Жылыту маусымына дайындықты өздері жасауы керек еді. Бірақ олар уақытылы жұмыстарды жасамағандықтан, жылу ең соңғы болып қосылады. Және де ПТС-қа олар жылу қосу туралы заявка да жібермеген.

Эльмира Кәленова