Қызылордада 27 мың кәсіпкердің құқы қорғалды

Қызылорда қаласында салық органы 27 мыңнан аса кәсіпкерлік нысанды заңсыз тексермек болған. Алайда прокурорлық қадағалау барысында құзырлы мекеменің іс-әрекеті тоқтатылды.

Себебі ережеге сай шағын және орта бизнес субъектілеріне тек салықтық заң бұзушылыққа жол берген жағдайда ғана тексеру жүргізіледі. Бірақ салық органы сауда орындарында акциздік өнімдердің заңсыз айналымын анықтау мақсатында жоспарлы тексеру ұйымдастырып, лауазымды тұлғалар құзыреттілігін асыра пайдаланған. Прокуратура кірістер басқармасының негізсіз шығарған шешімін тоқтатып, 27 мың кәсіпкердің құқығын қорғады.

Ұзақбай Дәуқараев, қала прокурорының орынбасары:

Енгізілген қадағалау актісінің қаралу нәтижесімен заңсыз шығарылған шешім негізінде жүргізілудегі тақырыптық тексеру тоқтатылып, қала аумағындағы 27 мыңнан астам кәсіпкерлік субъектінің негізсіз тексерудің алдын алынды. Осы бұзушылықтарға жол берген лауазым иелерінің тәртіптік жауапкершіліктері қаралды.

Әділбек Серікұлы