Ақтөбе облысында 3 ауыл жарықсыз қалды

Ақтөбе облысында жаңа жылды жеті ауылдың тұрғындары жарықсыз қарсы алды. Тағы екі елдімекенде байланыс үзілген.

Мұғалжар ауданында электр желілеріне қалыңдығы 5 см болатын мұз қатып, үзіліп қалған еді. Ауа райының қолайсыздығынан Ащылысай мен Сабындыкөл және Құмсай мен Ақсу ауылдарының ортасындағы 76 баған құлады. Қатқан мұздың диаметрі кей аумақтарда 20 см-ге дейін жетті. Кезекші бригадалар желілерді мұздан тазартумен айналысуда. Қажетті құрал-жабдықтар әкелінді. Жұрын, Қаракөл, Сабындыкөл ауылдарына да мамандар келді. Қазіргі уақытта 3 елдімекенде әлі жарық жоқ. Ауданда 70 бригада, 130 арнайы техника жұмыс істеп жатыр.

Дархан Ермағамбетов, Мұғалжар ауданының әкімі:

Күн күрт жылып, мұздақ электр желісінің бойына қатқандықтан, соның салмағымен кейбір жерде сым үзілуіне байланысты, кейбір жерде мұз қатуына байланысты жарық болмады. Қазіргі таңда 2 ауылда жөндеу жұмысы жүріп жатыр және мұзды желіден түсіру бойынша жұмыс атқарылып жатыр.

Жақсыбек Кемал