Наурызнама-2025: Дүниеге келген нәрестелердің ата-аналарына бесік берілді

Жалпыұлттық наурызнаманың онкүндігінің «Шаңырақ» күнінде Ақтөбеде дүние есігін енді ғана ашқан нәрестелерге бесік сыйланды.

Жас босанған аналарға ерекше құрмет көрсетілді. Ұлттық нақышта безендірілген бесіктер ұл және қыз балаларға лайықталып, толығымен жөргек-жаялықтарымен жабдықталған. Ұйымдастырушылар жастарға отбасы құндылықтарын, ата-баба дәстүрін насихаттауды мақсат еткен. «Бесік тарту» деп аталған бұл шарада аналарға баланы бесікке бөлеудің маңыздылығын түсіндірді.

Маржан Қорғанбаева, Әйелдер істері және отбасылық-демографиялық саясат жөніндегі комиссияның хатшысы:

«Әрине, сонымен қатар біздің жас аналарымызға да арналған тәтті тағамдардан, ұлттық тағамдардан да арналған сый-сыяпат бар. Бұл біздің ұлттық салт-дәстүрімізді насихаттауға беретін үлкен үлес деп есептейміз. Өйткені, атам заманнан әр баланың өз бесігі болуы керек, сол бесіктен ертең бәйтерек болып өседі деген үмітіміз бар».

Жақсыбек Кемал