Ақмола облысында еріктілер ескерткіштердің маңайын жинап, экологиялық акция өткізді

Бүгін – Халықаралық ескерткіштер мен тарихи орындар күні. Осыған орай Ақмола облысының жастар ресурстық орталығы жанындағы еріктілерді қолдау орталығы экологиялық акция ұйымдастырып, Көкшетаудағы ескерткіштердің маңайын тазалады.

Облыс орталығында 40-тан астам тарихи-мәдени мұра ескерткіші бар. Атаулы күні еріктілер қазақтың ұлы ғалымы, шығыстанушы, тарихшы, фольклоршы, этнограф Шоқан Уәлиханов ескерткішінің жанына жиналып, маңайын қоқыстан тазартты. Енді өзге де ескерткіштер айналасын жинап, абаттандыру жоспарланған.

Дидар Хамзин, облыстық Волонтерлерді қолдау орталығы фронт-кеңсесінің басшысы:

Бұл акцияның ең басты мақсаты - мәдени мұраларамыздың маңыздылығын өскелең ұрпаққа жеткізу және өзіміздің өлкемізді тазалықта ұстау болып табылады. Жазғы уақытта «Таза Қазақстан», «Таза жағалау» акциялары аясында Қылшақты өзені мен Қопа көлінің жағалауларынан қоқыстарды шығаруды жоспарлап отырмыз.

Бибінұр Әмірханқызы