Ұлттық ұлан сарбаздары 200 мыңнан астам қапшық дайындады

Ұлттық ұланның 800 курсанты СҚО-да 200 мыңнан астам қапшық дайындады. Олар 4 күннен бері төрт ауысымда тәулік бойы бөгеттерді нығайту және қорғаныс шекараларын салу жұмыстарына жұмылдырылды. Сондай-ақ 6637 әскери бөлімінің 400 әскери қызметшісі де қауіпті аймақта ауысыммен қызмет етіп жатыр. Салынған бөгеттің ұзындығы 2 шақырымнан асады. Күн сайын сол жерде еңбек етіп жүргеннің бірі - академия курсанты Тимур Қайырханов. Ол өзінің 23-ші туған күнін ерекше жағдайда атап өтті. 

Тимур Қайырханов, ҰҰ академиясының курсанты:

Бізде тәтті бәліш пен шам болмаса да, халыққа қызмет етіп жатырмыз. Біз Ұлттық ұлан академиясының курсантттары, дамбы көтеріп, ұлғайтып жатырмыз.

Біржан Тоқтарбек, ҰҰ академиясының курсанты:

Біз күніне 3 мыңдай инертті қаппен қаптап, өзіміздің көмегімізді тигізіп жатырмыз. Қазір 2 ауысымда жұмыс атқарып, халыққа көмек көрсету үстіндеміз. Күшіміз біздің бірлікте.

Ақниет Балтанова