Еуропалық Одақ АҚШ ғалымдарын тартуға 500 млн еуро бөлмек

АҚШ Президенті Дональд Трамп ғылым саласын қаржыландыруды шектеп жатқан тұста, Еуропалық Одақ америкалық ғалымдарды өзіне тарту мақсатында 500 миллион еуро инвестиция бөлмек. Бұл туралы Еуропалық комиссия төрағасы Урсула фон дер Ляйен мәлімдеді.

Парижде өткен басқосуда Еурокомиссия төрағасы мен Франция Президенті Эммануэль Макрон «шетелдік зерттеушілерді қолдау» туралы Еуроодақтың жаңа бағдарламасын таныстырды. «Ғылым үшін Еуропаны таңдаңыз» деп аталатын бұл бастама арқылы Еуропа ғылымын дамытуға шетелдік, әсіресе АҚШ ғалымдары тартылмақ.

Президент Макронның айтуынша, АҚШ-та қысым көрген оқымыстыларға Еуропада ғылыммен еркін айналысу үшін барлық жағдай жасалады.

Нұрсұлу Қасым