Тараз қаласының бұрынғы әкім орынбасары сотталды

Таразда бітпеген баспана үшін мердігерге 519 млн теңге аударған лауазым иесі сотталды. Енді қала әкімінің бұрынғы орынбасары 4 жылын түрмеде өткізеді.

Ал ақшаны алу үшін жалған құжат жасаған кәсіпкер 6 жылға бас бостандығынан айырылды. Әккі мердігер әуелі тендерді ұтқан. Бірақ көп қабатты 3 үйдің құрылысын аяқтай алмайды. Бірақ қабылдау құжатында баспаналар бой көтерді деп көрсеткен. Шикі іске қол қойған шенеунік сотта кінәсін мойындамаған. Бір қызығы экс-орынбасар былықтың беті ашылмай жатып, 3 апта бұрын өз еркімен қызметтен кеткен. Артынша тексеру басталып, тергеу 1 жарым жылға созылды.

Ербол Дүйсенбаев, Тараз қалалық №2 сот төрағасы:

Тараз қаласының әкімдігі сот қарау барысында талап-арыз беріп, бұл талап-арыз толық көлемде қанағаттандырылып, 2 тұлғадан ортақ көлемде 32 млн өндірілді. Ал ЖШС директорынан қалған 104 млн өндірілді. Жалпы 137 млн кінәлі тұлғалардан өндіріліп отыр.

Данияр Әлімқұл