Синтетикалық есірткі және интернет алаяқтармен күрес күшейеді

Мәжіліс төрағасы Ерлан Қошанов Ұжымдық қауіпсіздік туралы шарт ұйымы елдерінің парламентшілеріне синтетикалық есірткіге және интернет алаяқтыққа қарсы іс-қимылды күшейтуді ұсынды. Бұл туралы ол Бішкекте өткен ұйымның Парламенттік Ассамблея Кеңесінде айтты. Ерлан Қошанов Қазақстанда осы бағыттағы заңдар қатаңдағанын және интернет алаяқтық үшін жауапкершілікті күшейту жоспарланып отырғанын жеткізді. Сондай-ақ Ауғанстандағы жағдайға ерекше назар аударуға шақырды. Бұл ретте Алматыда БҰҰ-ның Орталық Азия мен Ауғанстан елдері үшін өңірлік орталығы құрылғанын еске салды. Сонымен қатар тәжік-ауған шекарасын нығайту қажеттігін айтты.

Ерлан Қошанов, Мәжіліс төрағасы:

Ұжымдық қауіпсіздік туралы шарт ұйымының Парламенттік Ассамблеясы синтетикалық есірткі мен киберқылмысқа қарсы іс-әрекет саласында ортақ құқықтық кеңістік құруға ықпал ете алады. Қазақстан депутаттары осы жұмысқа белсене атсалысуға дайын. Бұл мәселелерде бізде бұрыннан қалыптасқан құқықтық тәжірибе бар.

Шерхан Жамбылұлы