Таразда сауда орындары отқа оранды

Таразда күн күрт ысығалы өрт көбейді. Бұл жолы «Жібек жолы» базарындағы қойманың бірі отқа оранды. Қызыл жалыннан құрылыс материалдарының түгі қалмай жанып кетті. Тілсіз жау жарты сағатта 325 шаршы метрді шарпыған. Өрт сөндірушілер қойма қасындағы газ құю бекетінің жарылуына жол бермеді. Бетқаратпас жалынды ауыздықтауға 14 техника мен 40 қызметкер жұмылды.

Бұдан бөлек, қалада азық-түлік дүкені мен асхана ғимаратынан өрт шықты. Оқыс оқиға кезінде адамдар сыртқа шығып үлгерген. Әзірге тілсіз жаудың неден тұтанғаны белгісіз.

Данияр Әлімқұл