Елімізде 18 мыңнан астам бала церебральды сал ауруымен ауырады

Елімізде 18 мыңнан астам бала церебральды сал ауруымен ауырады. Ерекше балалардың жүріп-тұруына көмектесу үшін цифрлық технологиялар арқылы жұмыс істейтін құрылғыларды көбейту керек. Осы мәселе бүгін Астанада өткен «Балаларды оңалтудағы инновациялық тәсілдер» атты халықаралық ғылыми-практикалық конференцияда кеңінен талқыланды. Жиынға отандық дәрігерлермен қатар Франция, Италия, Қытай, Түркия секілді алыс-жақын шетелдерден 300-ден астам дәрігер мен логопед-дефектолог қатысты. Олар өзара тәжірибе алмаса отырып, медицинадағы инновациялық құрылғыларды меңгеру, сол арқылы ауыр дертке шалдыққандарға ем табу жайын қарастырды.

Ажар Ғиният, ҚР ДСМ Ұлттық балаларды оңалту орталығы басқарма төрағасы:

Реабилитациялық орталықтарға ең көп келетіндер, бірінші тұрған диагноз – сал ауруымен ауыратын балалар. Екінші орынға аутизм шығып келе жатыр. Қазір басқа мемлекеттерде роботталған реабилитацияға көп көңіл бөлініп жатыр. Жаңа технологияларды үйренуіміз керек.

Жанел Өтеулі