Қатерлі ісікке қарсы отандық дәрі зерттеліп жатыр

Отандық ғалымдар ойлап тапқан қатерлі ісікке қарсы препаратқа клиникалық зерттеу жасалып жатыр. Бұл туралы бүгін арнайы өткен баспасөз конференциясында айтылды. Биолог Дос Сарбасов бастаған зерттеуге аса ауыр жағдайдағы, обырдың соңғы шегіне жеткен 60 адам қатысып жатыр. Олар Алматыдағы Онкология және радиология институтындағы дәрігерлердің ұдайы бақылауында.

Еске салсақ, бұл зерттеу 3 жыл бұрын басталған. Бұған дейін жаңа дәріні тек тоқ ішек обырына шалдыққан науқастар қабылдады. Дәрігерлер олардың ісігі 30 пайызға азайғанын айтады. Енді препараттың қатерлі ісіктің басқа да түрлеріне қалай әсер ететіні зерттелмек. Клиникалық сынақ ойдағыдай аяқталса, обырдың төртінші сатысына жеткен науқастарға ем табылады.

Жанел Өтеулі