Үлескерлердің құқығын қорғауға бағытталған заң мақұлданды

Пәтер аламын деп, жиған-тергенін құрылысқа салатын үлескерлердің құқығы енді жіті әрі жан-жақты қорғалады. Бүгін Сенат тұрғын үй құрылысына үлестік қатысу мәселесі зерделенген заң жобасын қабылдады. Енді халықтың мүддесін қорғау мақсатында Үлескерлерді қолдау орталығы құрылады. Онда қай компания заңды, қайсысы тиісті құжатсыз жұмыс істеп жатқанын анықтай аласыз. Бұдан бөлек алдағы уақытта үйді қолма-қол ақшамен сатып алуға шектеу қойылуы мүмкін. Өйткені баспана сатып алу кезінде қолма-қол ақшасыз есеп айырысу көзделіп отыр. Салынып жатқан тұрғын үйлерді сатып алуға байланысты алдын ала шарттар жасасуға, сондай-ақ үлескерлердің ақшасын тартуға рұқсатсыз жарнамалауға да тыйым салынады.

Мәулен Әшімбаев, Сенат төрағасы:

Мақұлданған заң үлестік құрылыс саласында мемлекеттік реттеуді күшейтуді көздейді. Осы мақсатпен үлескерлердің құқығын қосымша қорғауды қамтамасыз ететін түзетулер топтамасы енгізілді. Заңда мүгедектігі бар адамдарды тасымалдауға қатысты қызметті оңтайландыруды көздейтін өзгерістер де бар. Сонымен қатар автомобиль жолдарын мемлекеттік басқарудың негіздерін жетілдіруге бағытталған ережелер қарастырылды.

Азамат Бейбітұлы