Үкімет басшысы: Тұрғын үй бағасы күрт өспейді

Жаңа Салық кодексі үй бағасына әсер ете ме? Көпшілікті алаңдатқан сұраққа Үкімет басшысы жауап берді. Олжас Бектенов қосылған құн салығының өсуі тұрғын үй бағасына күрт әсер етпейді деп мәлімдеді. Жаңа жылдан бастап құрылыс компаниялары пәтер сатқанда 16% салық төлейді. Қазір олар бұл алымнан босатылған. Премьердің сөзінше, Қазақстанда құрылыс қарқыны жоғары. Былтыр рекордты 18,9 млн шаршы метр пайдалануға берілді. Биыл бұл сан одан да жоғары болмақ. Ұсыныстың көп болуы бағаның тұрақтылығына әсер етеді деді Бектенов. Одан бөлек, Премьердің сөзінше, құрылысшылар баға қоярда салық жеңілдігін ескермей, артық пайда тапқан. Үкімет басшысы нарықтағы алыпсатарлық немесе сөз байласу арқылы бағаның көтерілуіне жол бермейміз деді.

Шерхан Жамбылұлы