Ақтаудағы бірнеше шағын ауданда жарық жоқ

Ақтауда аптап ыстықтан электр желілеріне жүктеме шамадан тыс артып, апаттық жағдайлар болып жатыр. Салдарынан соңғы күндері кейбір шағын ауданда тұрғындар жарықсыз қалған. Мәселен, кеше 15 апаттық жағдай тіркелген. Мамандар күні-түні жұмыс істеп, электр энергиясын қайта қосты. Ал бүгін тағы 3 жерде апат болған. Электр желілеріндегі ақауды жою жұмыстарына 3 жедел апаттық бригада, 4 кабель желілерін жөндеу қызметі, 4 электротехникалық зертхана мен арнайы техникалар жұмылдырылған.

Айта кетейік, Ақтау қаласындағы электр желілерінің жалпы ұзындығы 485 шақырымды құрайды. Оның 66%-ы, яғни шамамен 320 шақырымы тозған.

Этирбек Махамбетов, «Ақтау электр желілері басқармасы» МКК бас инженері:

Басты себеп, кабельдер ескірген, ауыстыру керек, оның қимасын қалыңдату керек. Оны ауыстырсақ, жарықтың сөнуі тоқтайды. Ауа райы ысып кеткеннен кейін елдің бәрі кондиционер қосқан, сол себептен жүктеме артып, қазіргі уақытта соның салдарынан сөнді.

Аягөз Оралбайқызы