Астанада бос жұмыс орындарына жәрмеңке ұйымдастырылды

«Жастар Рухы» жастар қанаты Астанада бос жұмыс орындары жәрмеңкесін ұйымдастырды. Шараға 3 мыңға жуық адам қатысқан. Бұл жәрмеңке студенттерді, түлектерді және жұмыс берушілерді біріктірген маңызды алаңға айналды. Жастар ұлттық компаниялардан бастап, өнеркәсіптік кәсіпорындарға дейін 70-тен астам компанияның өкілдерімен бетпе-бет сөйлесті. Олар жұмысқа орналасу мүмкіндігі туралы біліп, алғашқы сұхбаттан өтті. Дәл осындай шара еліміздің барлық облыс орталықтарында да өтіп жатыр. Соңғы 2 жылда осындай шаралардың нәтижесінде 55 мыңнан астам жас жұмысқа орналасты.

Ақерке Искандерова, «Amanat» партиясы «Жастар рухы» ЖҚ төрағасы:

Бұл жерде жұмыс берушілер мен жұмыс іздеушілер бір алаңда жиналып, байланыс орната алады. Ең басты мақсатымыз – жастар әрбір компанияға барып, жұмыс іздеп жүрмей, осы жерге оларды шақыртып, жастарға жағдай жасау. Шара бүкіл республика бойынша жыл сайын өткізіледі.

Ақниет Балтанова