Ақмола облысында қылмыстық топ 348 азаматтың атына несие рәсімдеген

Ұйымдасқан қылмыстық топ 348 азаматтың атына несие рәсімдеген. 25 адамнан тұратын топтың құрамында бірнеше өңірден адамдар болған. Арасында банк қызметкерлері де бар. Олар 5 жыл бойы алаяқтық жолмен тұрмысы төмен адамдарды алдап-сулап, құжаттарын пайдаланып несие рәсемдеп келген. Шығын көлемі 3,7 млрд теңге.

Меруерт Байболова, Ақмола облысы прокурорының көмекшісі:

Тергеу барысында заңсыз жолмен табылған пәтерлер, жер телімдері, қымбат автокөліктер мен қолма-қол ақша тәркіленді. Тәркіленген мүліктің жалпы құны 2,7 млрд теңге болды. Топтың барлық қатысушылары ұсталып, уақытша ұстау изоляторына қамалды. Қазіргі таңда қылмыстық іс процесс қатысушыларына танысуға берілді, түпкілікті шешімді сот шығарады.

Бибінұр Әмірханқызы