Биыл жалпы сомасы 1,5 трлн болатын 190 жобаны іске қосу жоспарланған

Қазақстанда жыл басынан бері өндіріс индексі былтырғы көрсеткішпен салыстырғанда 6,9%-ға асып түскен. Бұл туралы Премьер-Министр Олжас Бектенов Үкімет мүшелерінің қатысуымен AMANAT партиясы фракциясының кеңейтілген отырысында айтты. Жиын Мемлекет басшысының Қазақстан халқына кезекті Жолдауы қарсаңында ұйымдастырылған. Премьер-Министр Үкіметтің Президенттің стратегиялық бастамаларын орындау мақсатында дәйекті жұмыстар жүргізіп жатқанын айтты.

Олжас Бектенов, ҚР Премьер-министрі:

Биыл өңдеу өнеркәсібінде жалпы сомасы 1,5 трлн теңге болатын 190 жобаны іске қосу жоспарланған. Нәтижесінде 20 мыңнан астам жаңа жұмыс орны құрылып, өндіріс көлемі 2,2 трлн теңгеге жетеді деп күтілуде.

Сондай-ақ Үкімет әлеуметтік-экономикалық даму болжамын және алдағы үш жылдық кезеңге арналған республикалық бюджет жобасын мақұлдап, Парламентке енгізді. Базалық сценарий бойынша үш жыл ішінде экономиканың нақты орташа жылдық өсімі 5,3%-ды құрамақ.