Әлеуметтік көмек алу үшін құжат жасатқандар ұсталды

Жүктілік кезінде және бала күтіміне берілетін жәрдемақы, атаулы әлеуметтік көмек төлемдерін заңсыз тағайындау деректері анықталды.

Қаржылық мониторинг агенттігі 13 қылмыстық істі қараған. Мемлекетке келген шығынның жалпы сомасы - 1 млрд 200 миллион теңге. Соның ішінде жүктілік пен босануға берілетін жәрдемақыларға қатысты 10 іс тергеліп, 15 адам жауапқа тартылды.

Жалған жұмыспен қамту схемасына байланысты 385 жүкті әйелді кәсіпкерлерге жұмысқа орналастыру арқылы мемлекетке 1 млрд теңгеден астам шығын келген. Ал атаулы әлеуметтік көмекті тұрақты табысы бар азаматтарға тағайындаған 15 жұмыспен қамту және әлеуметтік бағдарламалар бөлімдерінің лауазымды тұлғаларына қатысты 3 іс қозғалды.