Палестинаны қолдауға арналған шеруге 110 мың адам қатысты

Брюссельде Палестинаны қолдауға арналған жалпыеуропалық шеру өтті. Палестина-Бельгия қауымдастығы ұйымдастырған шараға 110 мыңнан аса адам қатысқан. «Палестинаға бостандық, «Геноцидті тоқтатыңдар»,- деп ұрандатқан шерушілер ЕуроОдақ басшыларынан Газадағы атысты тоқтатып, Израильге қарсы экономикалық, дипломатиялық санкция енгізуді талап етті. Палестина-Бельгия қауымдастығы ұйымы өкілдерінің мәліметінше, Газада қаза тапқандардың саны 64 мыңнан асқан.

 Лара, Брюссель қаласының тұрғыны:

Палестинада кішкентай балаларды, сәбилерді жазықсыз өлтіріп жатыр. Қаншама бала әке-шешесінен айырылды. Соғысты тезірек тоқтатуды өтінемін.

 Амуш Готье, «Палестина-Бельгия» қауымдастығының мүшесі:

Еуропалық Одақ Израиль үкіметінің Палестинада жасап жатқан сорақылығын геноцид деп тануы тиіс. Газадағы атысты тоқтатып, Палестинаға бостандық берілсін.