Атыраулық оқушы жолдағы шұңқырларды анықтайтын құрылғы ойлап тапты

Жол сапасын жақсартуға мектеп оқушылары да өз үлесін қосуда. Атыраулық жас өнертапқыш 11 сынып оқушысы Саян Ибрагимов жол бетіндегі шұңқырларды анықтайтын арнайы құрылғы ойлап тапты. Оның мақсаты – жүргізушілердің қауіпсіздігін қамтамасыз етіп, жол-көлік оқиғаларының алдын алу. Құрылғы жолдың ой-шұңқырын автоматты түрде анықтап, мәліметті бірден арнайы базаға жібереді. Бұл деректер жол жөндеумен айналысатын мекемелерге көп көмегін тигізері сөзсіз. Қарапайым құрылымымен ерекшеленетін жоба – Саянның өз идеясы. Өткен жылы мұны ғылыми жоба ретінде қорғап шыққан. Ендігі жоспары биыл құрылғыны одан әрі жетілдіріп, қолданысқа енгізу.

 Саян Ибрагимов, жас өнертапқыш:

Осы құрылғыны әкем екеуміз көліктің астына бекіттік те үй жақтағы жолдарда бір жүріп өттік. Бәрі ойдағыдай өтті. Бүкіл шұңқырларды анықтап берді. Мұның барлығы excel деген программаға түседі. Енді осы жобамды жетілдіріп әр түрлі стартаптарға, жарыстарға қатысамын деген үміттемін.