Президент бір палаталы Парламент құруды ұсынды

Сенат өзінің тарихи миссиясын абыроймен, тиімді атқарып шықты. Осылай деген Мемлекет басшысы бүгінгі Жолдауында елімізде бір палаталы Парламент құру туралы бастама көтерді. Яғни, Сенат қысқарып, Мәжіліс қана қалады. Қасым-Жомарт Тоқаевтың пікірінше, бұл мәселені асығыс жүзеге асыруға болмайды. Реформа азаматтық секторда, сарапшылар ортасында және қазіргі Парламентте жан-жақты талқылануы қажет.

Қасым-Жомарт Тоқаев, Қазақстан Республикасының Президенті:

Реформаның мән-маңызы айрықша екенін ескерсек, оны талқылауға бір жыл уақыт керек деп ойлаймын. Содан кейін, яғни 2027 жылы жалпыұлттық референдум өткізуге болар еді. Содан соң Конституцияға тиісті өзгеріс енгізе аламыз. Мен мемлекеттің тағдырын айқындайтын барлық мәселе халықтың келісімімен ғана шешіледі деп бұған дейін бірнеше рет айттым. Егер бір палаталы Парламент құру қажет деген ортақ шешімге келсек, ондай Парламентті тек қана партиялық тізім бойынша сайлаған жөн деп санаймын. Бұл – әлемде кеңінен тараған парламенттік рәсім.