Елімізде коммуналдық желілер жаңғыртылмақ

Елордадағы коммуналдық желілерді  жаңғырту жұмысына екпін берілмек. Бұл бағытқа 2025-2029 жылдар аралығында 73 млрд теңге көлемінде инвестиция тартылмақ.

Бес жылдың бедерінде Астана қаласының өзінде 10 шақырымдай жылу желілері салынып, 52 шақырым сумен жабдықтау және су бұру желілері жаңартылмақ. Бүгін «Энергетика және коммуналдық секторларды жаңғырту» ұлттық жобасын іске асыру мақсатында өткен кеңесте аталған мәселелер жан-жақты талқыланды. Айта кетейік, ұлттық жоба аясында биыл жалпы құны 22,5 млрд теңгеге Қарағанды, Павлодар, Солтүстік Қазақстан және Батыс Қазақстан облыстарында барлығы 10 жоба қаржыландырылған. 

Әлия Мырзағалиева, «Бәйтерек» ұлттық басқарушы холдингі» АҚ басқарушы директоры:

Көбіне бізге келіп жатқан жобалардың басым бөлігі жылумен, электрмен және сумен жабдықтау жүйелеріне қатысты. Қазір бұл желілердің тозу деңгейі 63 пайызға, кейбір жерде тіпті 90 пайызға дейін жеткен. Біздің мақсат — тозу деңгейін төмендетіп, осы саладағы субъектілердің жұмысын үздіксіз қамтамасыз ету.