Шетелдік оқытушылар Ақтөбеде ағаш екті

Шетелдік оқытушылар «Таза Қазақстан» акциясына үлес қосты. Олар «Heriot-Watt» университетінің Ақтөбедегі кампусының аумағына ағаш екті.

«Жасыл ел» еңбек жасақтарының штабы ұйымдастырған шараға Италия, Иран, Пәкістан және Мысырдан келген профессорлармен бірге студенттер де қатысты. Акция «Менің атаулы ағашым» деп аталғандықтан, олар өздері еккен көшеттерді жайқалып өсіп кеткенше қадағалап, күтіп-баптап отыруды мойындарына алды. Болашақта бұл аумақ үлкен саябаққа айналуы тиіс.

Ахмат Халид, «Heriot-Watt» университет Ақтөбе кампусының оқытушысы:

Пәкістаннан келіп, осындай акцияға қатысып жатқаныма қуаныштымын! Алғысымды білдіремін. Қоршаған ортаны таза ұстау – барлығымызға міндет. Біздің елде де осы секілді шаралар өтіп тұрады. Көгалдандыру ағаш егу жұмыстары ақпан айында басталады.