ЕуроОдақ Орталық Азия елдерімен байланысты нығайтуда Қазақстанға сенім артады

Еуропалық Одақ Орталық Азия елдерімен өңіраралық байланысты нығайтуда аймақтың көшбасшысы Қазақстанға сенім артады. Бұл туралы Люксембургта өткен Орталық Азия, Шығыс серіктестік елдері, Түркия және Еуропалық Одақ арасындағы инфрақұрылымдық байланысты арттыруға арналған кездесуде айтылды. Басқосуға еліміздің Сыртқы істер министрінің орынбасары Арман Исетов қатысты. Кездесуде тараптар көлік, цифрлық трансформация, энергетика және сауда салаларында өзара байланысты күшейту мәселелерін талқылады. Сондай-ақ Транкаспий халықаралық көлік дәлізін дамыту, инфрақұрылымдық желілерді жаңғырту жайын қаузады. Арман Исетов жиналғандарға Қазақстанның көлік-логистика саласын дамытуға бағытталған тың жобаларын таныстырды. Басқосуға жиналғандар Орталық Азиядағы ең ірі экономика және басты транзиттік ел Қазақстанның өзара байланысты арттырудағы рөлін жоғары бағалады.