Жамбыл облысындағы Жуалы ауданы 100 пайыз ауыз сумен қамтылды

Жамбыл облысындағы Жуалы ауданы 100 пайыз ауыз сумен қамтылды. Бұған дейін 2 мыңнан астам тұрғыны бар Күреңбел ауылдық округіне ғана тіршілік нәрі тартылмаған болатын. Енді 43 шақырым құбыр тартылып, 394 аула таза ауыз су жүйесіне қосылды. Ал былтыр аудандағы Түктібай, Ақтөбе, Қарасу, Көктас, Күркіреусу және Амансай ауылдарында су станциялары қайта жаңғыртылды. Осылайша Жуалыдағы жалпы саны 49 елді мекен тіршілік нәрімен толық қамтылды.

Айта кетейік, Президенттің тапсырмасына сәйкес биыл аймаққа 14 млрд теңгеге жуық қаржы бөлінген. Жыл соңына дейін тағы 14 ауылға су жүйесі тартылады.

Еркебай Нағашыбеков, Күреңбел ауылының тұрғыны:

Адам баласына ең керекті бірінші мәселе – ауыз су. Ауыз су мәселесі бізде қанша уақыттан бері айтылып келе жатқан еді. Міне, ашылып, елдің бәрі қуанышты. Сондай рахаттанып, мына жерде шауып жүрміз бәріміз!