«Таза Өскемен» кәсіпорнының басшылары ₸120 млн ұрлады деген күдікке ілікті

«Таза Өскемен» кәсіпорнының бұрынғы басшылары 120 млн теңге жымқырды деген күдікке ілікті. Қаржылық мониторинг агенттігі сотқа дейінгі тергеп-тексеру жүргізіліп жатқанын хабарлады. Күдіктілердің арасында мекеменің бұрынғы директоры, оның орынбасары және жеке кәсіпкер бар. Олар 2022-2023 жылдар аралығында мемлекеттік сатып алу рәсімдерін өткізбестен, жүйелі түрде бюджет қаражатын өздерімен байланысы бар коммерциялық құрылымдардың есепшоттарына заңсыз аударып отырған. Қылмыстық жолмен алынған ақшаға қымбат көліктер және пәтер сатып алғандары анықталды. Кәсіпорынның бұрынғы директоры бұлтартпау шарасы ретінде екі ай мерзімге қамауға алынды. Тергеу жалғасуда.