ІІМ көлік жүргізушілеріне сақ болуды ескертеді

Ішкі істер министрлігі ел аумағында ауа райының бұзылуына байланысты автокөліктерді қысқа дайындау қажеттігін және мейлінше сақ болу керегін ескертеді. Күн райы күрт құбылса, алыс сапарлардан бас тартуға кеңес береді. Өйткені синоптиктердің болжамынша, бүгіннен бастап көптеген өңірлерде қар жауып, көктайғақ болады, жел күшейіп, жолдың көрінуі қиындайды. Бұған дейін «Қазгидромет» 4-6 қараша аралығында 11 өңірде қолайсыз ауа райы болатынын хабарлаған еді.

Айдын Оразбаев, ІІМ Әкімшілік Полиция комитеті басқармасының бастығы:

Доңғалақтардың, тежегіш жүйесінің жағдайын, техникалық сұйықтықтардың деңгейін және қажетті қысқы жабдықтардың бар-жоғын тексеріңіздер. Әсіресе жолаушылар тасымалдаумен айналысатын және қалааралық жолдарға шығатын жүргізушілерге айтарымыз: жылдамдық режимін, арақашықтықты және маневр жасау ережелерін сақтаңыздар.