Филиппиндегі «Фунг-Вонг» тайфунынан 4 адам қаза тапты

Филиппинде сұрапыл «Фунг-Вонг» тайфунынан 4 адам қаза тапты. Миллионнан астам тұрғын қауіпсіз жерге көшірілген. Тоқтамай жауған нөсер мен екпіні қатты желден тұрғындар түні бойы көз ілмеген. Жолдарды су басып, лай көшкіні жүрді. Кей елді мекендер сыртқы әлеммен байланысты үзген. Қазір желдің жылдамдығы сағатына 130-160 шақырымға дейін бәсеңдеді. Алайда тайфуннан төнген қауіп сейілген жоқ. Тағы да нөсер жауын жауып, жел күшеюі мүмкін. «Фунг-Вонг» - биыл аралдық мемлекетте көтерілген 21-тайфун. Өткен аптада «Калмаеги» тайфунынан Филиппинде 224 адам, Вьетнамда 5 тұрғын мерт болды.