Боччадан Қазақстан кубогы үшін жарыс басталды

Астанада паралимпиадалық боччадан Қазақстан Кубогы үшін жарыс басталды. Биылғы сайыс елордадағы «Аспан» спорт кешенінде өтіп, алғаш рет 8 корт дайындалды. Бұл - рекордтық көрсеткіш. Жарысқа еліміздің 15 өңірінен 120 параспортшы қатысып жатыр. Олар жеке, жұптық және командалық сындарда бақ сынайды. Дода 14 қарашаға дейін жалғасады. Қазақстан бочча федерациясының президенті, Парламент Сенатының төрағасы қатысушыларға сәттілік тілеп, елде боччаның қарқынды дамып келе жатқанын атап өтті. Мәулен Әшімбаевтың айтуынша, Мемлекет басшысының тапсырмасына сәйкес, инклюзивті және кедергісіз орта қалыптастыру бағытында жүйелі жұмыс жүргізілуде.