Бір палаталы парламентке көшу заңдарды жылдам қабылдауға мүмкіндік береді

Бір палаталы Парламентке көшу заңдарды жылдам қабылдауға мүмкіндік береді. Мәжіліс депутаттары осындай пікірде. Құрылымды өзгертер алдында азаматтардың, өңірлердің, қоғамдық ұйымдардың, партиялардың құқығы қаншалықты қорғалатындығын ескеру маңызды. Сарапшылардың пікірінше, жаңа модель заң шығару үдерісін жеңілдетіп, жауапкершілікті бір орталыққа шоғырландырады. Парламентке жүктелер міндет те арта түседі. Сондықтан халықтың сұранысын уақытылы ескеріп, тиімді шешім қабылдау - депутаттардың негізгі міндеті болмақ.

Болат Керімбек, ҚР Парламенті Мәжілісінің депутаты:

Бір заң жобасын қабылдауға кемінде 1 жыл, 1,5 жыл уақыт кетіп жатады. Ал қоғамда жаңа технологиялардың енуі заңдарға жиі өзгертулер мен толықтыруларды енгізуді қажет етеді. Сондықтан Мәжілістің қабырғасында заң қабылданып, бірден Сенатқа жіберіліп, олар қайтып келіп жатады. Осы процедуралық дүниелер ұзақ уақыт алады деп ойлаймын.