Ислам ынтымақтастығы ойындары: Қазақстан 7-орында

Сауд Арабиясының астанасы Эр-Рияда өтіп жатқан алтыншы Ислам Ынтымақтастығы ойындарында  Қазақстан құрамасының қоржынына тағы бір күміс және қола жүлде түсті. Семсерлесуден София Актаева күміс жүлде алды. Ал 53 келіде әйелдер күресінде сынға түскен Зейнеп Баянова қола жүлде үшін болған белдесуде тәжік қызын айқын басымдықпен ұтты. Зейнептің бұл ойындардағы алғашқы жүлдесі. Сонымен қатар гандболшы қыздарымызда финалға жолдама алды. Жартылай финалда өткен тартысты бәсекеде олар Иран құрамасынан 29 да 26 есебімен жеңді. Ертең өтетін шешуші кезеңде отандастарымыз Түркия құрамасымен кездеседі.  Байрақты бәсеке де ертең аяқталды. Әзірге спортшыларымыз 43 медаль еншілеп, жалпы есепте 7 орында тұр.