Басты Жаңалықтар Жалақы, инфляция, баға: Медианалық еңбекақы қалай есептеледі?

Жалақы, инфляция, баға: Медианалық еңбекақы қалай есептеледі?

23.11.2025 19:46

Үкімет алдағы 3 жылға есептелген елдің әл-ауқатын арттыруға арналған бағдарламасын бекітті.

Премьер-министр Олжас Бектеновтің айтуынша: «Халықтың тұрмыс деңгейі мен әл-ауқатын арттыру – экономиканың сапалы әрі орнықты өсуі және инфляцияны төмендету есебінен қамтамасыз етіледі. Бағдарламаның негізгі мақсаты – экономиканың жыл сайынғы өсімін кемінде 5%-ға және халықтың нақты табысын орта есеппен 2–3%-ға арттыру».

Иә, қазір ең өзекті мәселе – 13%-ға жеткен инфляция. Әйтпесе, табысты жеп барады. «Ақшаның құны жоқ» деп күңкілдеп жүрміз.

Үкімет инфляцияны қалай төмендететінін жалпылама түсіндіреді. Сонымен бірге ең төменгі жалақыны көтеру керегін де түсінеді. Әйтеуір, алдағы 3 жылда қарастыратындарын айтты. Осы күзде бюджетті екшегенде Мәжіліс депутаттары ең төменгі жалақыны 110 мың теңгеге өсіруді ұсынған. Көнбеді.

Қазір еліміздегі ең төменгі жалақы – 85 мың теңге. Миллионнан астам адамның айлық табысы осы мөлшерден аспайды. Үштен бірі одан да аз алады. Бұл мәліметті Еңбек және халықты әлеуметтік қорғау министрі Светлана Жақыпованың өзі айтқан.

Ал Мәжіліс депутаты Елнұр Бейсенбаевтың есебінше, 85 мың теңге алатындар саны – 1 млн 800 мың. Ал үш миллион адамның жалақысы небәрі 200 мың теңге.

Соңғы апталарда еліміздің бірнеше қаласында жедел жәрдем фельдшерлерінің жалақының өте төмендігін айтып, арызданып жатқаны – амалы қалмағаннан.

Автор

Данияр Қайыртай

Бөлісу