Маңғыстаулық белсенділер біліктілігін арттырып жатыр

Астанада Маңғыстау облысының белсенді азаматтарына арналған «Көшбасшылар керуені» жобасы басталды. Қатысушылар үш күн ішінде мемлекеттік органдардың жұмысымен танысып қана қоймай, өңірдің дамуына қатысты мәселелерді талқылап, тәжірибе алмасады. «STUDY TOUR» бағдарламасы аясында қоғамдық кеңес мүшелері мен үкіметтік емес ұйым өкілдері оқудан өтеді. Сонымен бірге, көшбасшылық, коммуникация және құқықтық дағдылар күшейеді. Делегация құрамында 15 қатысушы бар. Олар облыстық кезеңде 50 адамның арасынан іріктеліп алынған. Жоба облыстық Ақпарат және қоғамдық даму басқармасының тапсырысы бойынша «Маңғыстау облысы Азаматтық альянсы» ұйымдастыруымен жүзеге асырылып жатыр.

Әділет Әбішаев, Жаңаөзен қаласы қоғамдық кеңесінің мүшесі,  кәсіпкер:

Өзіміздің ойымызда елге, халыққа пайдамызды тигізейік деп жүрген жобаларымызды іске асыру мақсатында, яғни сұрақтарымызды профессорлармен, академиктермен ақылдасып, жобаларымызды таныстырып,ақыл-кеңестерін алдық. Үлкен нәтижелі сабақ болды.