Түркі әлемінің жастары бас қосты

Түркия астанасы Анкара қаласында түркі әлемі жастарының форумы өтті. Қазақ, түрік, өзбек деп бөлінбей, 500-ге жуық жас бір шаңырақ астына жиналды. Олар түркі мемлекеттері арасындағы ынтымақты нығайтуда жастардың ролі қаншалықты маңызды екендігіне тоқталды. Сондай-ақ мұндай шаралар өңірлік тұрақтылыққа сеп болып, ортақ даму стратегиясына серпін беретінін тілге тиек етті. Жиында ортақ құндылықтар дәріптеліп, бауырлас елдердің өнері бір сахнада өрілді. Ән мен күй, ұлттық би мен заманауи шығармалар көрерменге түркі халықтарының терең тамырын, рухани жақындығын сездірді. Ұйымдастырушылар Түркі жастарының жиынын жыл сайын өткізуді жоспарлап отыр.