Д.Исабековтың кітабы түрікше жарық көрді

Ыстанбұл қаласында белгілі жазушы Дулат Исабековтың «Тіршілік» атты кітабы түрік тілінде жарық көрді. Кітапқа жазушының таңдаулы шығармалары жинақталған. Түркиядағы ең үлкен кітапханалардың бірінде өткен тұсаукесер рәсімінде сондай-ақ қазақ әдебиетінің бүгінгі тынысы мен шет мемлекеттерде таныстырылу жайы да талқыланды. Түркиялық жазушылар қазақ әдебиетінің Түркияда әлі де кең танылмай тұрғанын тілге тиек етті. Жиналған зиялы қауым өкілдері бауырлас екі ел арасындағы шығармашылық байланысты нығайту жолдарын да қарастырды. Басқосуға Дулат Исабековтың ұлы арнайы қонақ ретінде қатысты. Жиын соңында шағын концерт ұйымдастырылып, қазақтың ән-күйлері шырқалды.

Бүгінгі конференция биік деңгейде өтті. Папамның бүгінгі тұсаукесер кітабы «Тіршілігі» екі елдің көпірін жалғап, екі елдің басын қосқан жер. Өзімнің атымнан, отбасымның атынан үлкен ризашылығымды білдіргім келіп тұр. Рахмет айтқым келіп тұр.

Өкінішке қарай қазақ әдебиеті Түркияда тиісті деңгейде таныстырылмай жүр. Өзім Дулат ағаның 7 әңгімесін аудардым. Олардың төртеуі бірнеше жыл бұрын түрікше кітап болып басылып шыққан еді. Бүгінгі жиында Дулат ағаның шығармалары арқылы қазақ әдебиетін түрік оқырмандарына тереңірек таныстыруды көздедік. Оқырмандар тарапынан қызығушылық өте жоғары болды.