Ауылдар мен шағын қалалардағы кәсіпкерлерге қолдау болады

Премьер-министр Үкімет отырысында қолөнер, былғары және сүт өңдеумен айналысатын кәсіпкерлерді қолдауды тапсырды. Яғни, ауылдар мен шағын қалалардағы жобаларға басымдық берілмек. Үкімет басшысы әкімдерге шағын және орта бизнеске көрсетілетін көмектің басым бағыттарын қайта қарауды міндеттеді. Осылайша жергілікті өндіріс пен шикізатты қайта өңдеуді ынталандыру, қолөнер, былғары, сүт өнімдері және басқа да салаларды кеңейту шараларын қамту көзделіп отыр.

Мемлекет басшысы «Алтын сапа» және «Парыз» сыйлықтарының лауреаттарын марапаттау рәсімінде шағын бизнесті қолдаудың бірыңғай бағдарламалық құжатын қабылдауды тапсырды. Ол іскерлік белсенділікке және шағын кәсіпкерлікті дамытуға қосымша серпін беруге тиіс. Ұлттық экономика министрлігі мемлекеттік органдармен және «Атамекен» ұлттық палатасымен бірлесіп, құжаттың сапалы әзірленуін қамтамасыз етсін.