Әлемнің ең мықты бадминтоншылары бақ сынап жатыр

Астанада өтіп жатқан бадминтоннан халықаралық турнирдің бірінші кезеңінде жекелей ерлер категориясы бойынша жерлесіміз Дмитрий Панарин алда келеді. Және ол ең үздік 16 ойыншы қатарына енді. Бірақ финалға өту үшін әлі екі кезеңді еңсеру керек. Жалпы, әлемдік додада Қазақстан атынан 26 ойыншы бақ сынауда. Еліміз үшін бұл - әлемдік деңгейдегі үшінші турнир. Оған 43 мемлекеттен 200-дей спортшы қатысып жатыр. Сарапшылар бұл турнирді маусымның айтулы жарыстарының бірі және Бадминтонның Дүниежүзілік федерациясының ресми күнтізбесіне енген маңызды спорттық оқиға деп бағалап отыр. Халықаралық турнир 21 желтоқсан күні мәресіне жетеді.

Дмитрий Панарин, «Astana International Challenge 2025» халықаралық турнирінің қатысушысы:

Қарсыласым - Үндістан ойыншысы. Осал емес. Оның ойын стилі мен үшін ыңғайсыз болды. Соған қарамастан жеңдім. Әсіресе екінші сет оңай болған жоқ. Бірақ өзіме деген сенімділік мені жеңіске жетелеп келеді.