ЕО елдері Украинаға көмекке 90 млрд еуро бөлуге уағдаласты

Еуропа одағы елдері Украинаға 90 миллиард еуро пайызсыз несие бөлетін болды. Мұндай шешім осы аймақ елдері басшыларының Брюссельде өткен саммитінде қабылданды.

Германия канцлері Фридрих Мерц мәлімдегендей, бұл заем алдағы екі жылда Украинаның әскери және бюджеттік қажеттіліктерін жабуға жұмсалады. Айта кетсек, Киевке 2026-2027 жылдары 135 миллиард еуро қажет болады.

Дегенмен Ресей соғыс үшін құн төлемесе, Украина одақ берген несиені қайтармауға құқылы. Және де Мәскеу өтемақыдан бас тартса, Брюссель Украинаға жұмсаған қаражаттың орнын Ресейдің шетелдегі есепшоттарында бұғатталған валюталық активтермен толтыруы мүмкін.